Imithetho Yezithuthuthu

Izigqoko Nokuvikela Amehlo: Ukuzivikela Kwakho Kokuqala

Into ebaluleke kakhulu kumshayeli wesithuthuthu yisigqoko sokuzivikela sesithuthuthu. Umthetho udinga ukuthi bonke abashayeli bezithuthuthu nabagibeli babo noma abagibeli bamakali aseceleni bagqoke isigqoko sokuzivikela sesithuthuthu esamukelwayo.

Zikhona izinhlobo neziteli eziningi zezigqoko zokuzivikela zesithuthuthu, kodwa kunezinhlobo ezimbili ezibalulekile:
• Isigqoko esivala ubuso bonke nesivulekile ebusweni.
• Izigqoko ezivala ubuso bonke zinephaneli yesilevu ehlanganisa isivikelo sobuso (i-visor) esinikeza ukuvikeleka okungcono emehlweni, emoyeni, elangeni nasekulimaleni.
• Isigqoko sakho kumele samukelwe yi-SABS.
• Kumele silingane kahle kodwa singaqini kakhulu (gwema izigqoko ezixegayo).
• Kumele ibhande lesilevu libe liboshiwe futhi liqiniswe kahle.

Izigqoko zokuzivikela kumele:
• Zishintshwe ngemva kwengozi noma ngemva kokushayeka okukhulu.
• Zishintshwe uma sezixega, noma amabhande esegugile.
• Zihlanzwe ngamanzi anensipho ethambile kuphela. Amanye amakhemikhali nezihlanzi angase abuthakathakise igobolondo.

Amehlo akho adinga ukuvikelwa emoyeni, othulini, emvuleni, ezinambuzaneni nasematsheni aphonswa ezinye izimoto. Yi-visor eboshelwe esigqokweni noma izibuko zokuzivikela kuphela ezinikeza ukuvikeleka kwamehlo okudingekayo ekushayeleni.

Ezinye izithuthuthu zinezivikelo noma amafairing anikeza ukuvikeleka esimweni sezulu. Lezi azinikezi ukuvikeleka okwanele kwamehlo futhi kumele usasebenzisa i-visor noma izibuko zokuzivikela ukuvikela amehlo akho.

I-visor nezibuko zokuzivikela kumele:
• Zihlanzeke futhi zingabi namanxeba.
• Zingaphahlazeki zibe yizicucu.
• Zibe namalensi acacile wokusebenzisa ebusuku.